輪椅上的離婚案（下）
上集：https://bit.ly/3r8lWKW
我唔知點答好，不過上司講到出口，我都冇辦法拒絕。
好彩，梁生講低咗聯絡資料，於是我就去咗佢屋企附近，向街坊打聽吓消息。
原來，梁太平時都會推住梁生嘅輪椅出入，大家都對佢哋印象深刻。
街坊感慨：「其實有個咁嘅老婆，都算幾生修到。」
「係囉，初時人人都以為梁太會走佬，點知十幾年啦，個個都跌晒眼鏡。」
我扮作不經意咁問：「聽講梁太好惡㗎喎，係咪成日鬧梁生？」
師奶甲話：「你喺邊度聽番嚟㗎？梁太好友善㗎。」
師奶乙插嘴：「梁太對街坊就好友善，不過佢對梁生都幾惡。嗰次佢哋去飲茶，我見梁太指住梁生個鼻，鬧佢『廢柴』。」
「車，我都成日鬧我老公啦。」師奶甲嗤之以鼻：「梁太咁樣照顧佢，端屎端尿，鬧兩句算乜嘢？」
我到處打聽，得到嘅資訊都係差唔多。
梁太勤奮堅強，與人為善，獨力照顧梁生十幾年，真係冇咩缺點。
行吓行吓，我撞到梁生，一個圓臉女人推住佢㗎輪椅，我諗住應該係梁太。
我行近幾步，就聽到梁太壓低聲音鬧緊梁生：「如果唔係你，我唔駛搞成咁，你話你個人仲有咩用？」
我有啲尷尬，正想快步走開，點知梁生見到我，好似見到救星咁大叫：「律師！」
「我唔係律師，只係律師樓嘅助理。」我唯有解釋。
梁太好懷疑咁望住我：「律師？你幾時去過律師樓㗎？」
梁生猶豫咗一下，冇出到聲。
梁太催促梁生：「喂，問你嘢啊，你唔止癱咗，仲啞咗啊？」
「係啊，我認啦，我要同你離婚！我去咗律師樓，就係想同你搞離婚。」梁生大叫。
一時間，梁太呆咗，我都呆咗。
「我有咩對唔住你？」梁太聲淚俱下，講自己十五年嚟照顧梁生嘅辛酸，我作為外人，聽到都覺得好感動。
「我哋初初結婚嗰陣，你好溫柔㗎。我出咗事之後，你就對我愈嚟愈惡。」
梁生嘆氣：「我知道你係壓力大，但……我真係好辛苦，每次俾你鬧，我都覺得呼吸唔到。我連夜晚發惡夢，都見到你鬧我。」
梁太冷笑：「好啦，你想同我離婚，離咗婚邊個照顧你？唔駛一個星期你就死得。」
「我寧願死，都唔想繼續呢種生活啊！」梁生大怒。
佢哋兩個嘈到面紅耳赤，我聽嚟聽去，梁太真係得「鬧梁生」一個缺點。
梁生忽然望向我：「你講，幫唔幫我搞離婚？」
「法庭判決離婚，都要確保雙方離婚後，可以正常生活到。」
我轉頭望向梁太，安慰佢：「梁生都係一時火起啫，你哋以後多啲溝通，少啲嘈交就冇事㗎啦。」
講完啲客套說話，我就離開咗呢個尷尬嘅場景。
後來，梁生都冇再嚟過律師樓，我估佢都死心啦。
好彩，上司了解晒情況之後，都冇再逼我去搵梁生。
直到有一次，我路過梁生住開嗰區，我見到街柱上貼滿尋人啟示，失蹤嘅係梁生。
我好驚訝，忍唔住去搵梁太，問吓咩事。
梁太話，警方查過閉路電視，確定係梁生趁佢唔喺屋企，自己坐住輪椅出咗門，之後就冇返過嚟，亦冇人知佢喺邊。
「佢咁嘅身勢，自己走，係死路一條㗎。」梁太喊到眼都腫埋：「佢連錢都冇帶啊。」
梁太忽然問：「我係咪好衰？」
我即刻答：「點會呢？梁生娶到你，真係幾生修到。」
「我以前都咁諗，我咁樣照顧佢法，只係鬧佢幾句啫，唔係咩問題。」
梁太苦笑：「但係佢寧願走……寧願死，都唔想留喺我身邊。」
我都唔知點安慰佢好。
之後，我經常會諗起呢件事。
或者，大家都覺得，身體上嘅照顧係最重要，梁生偏偏覺得，俾老婆鬧先係比死難受。
同一件事，每個人都有唔同感覺，我哋習慣用自己嘅價值，去判斷人哋係啱定錯。
即使判斷到對方係錯，但受苦嘅，依然係對方。
—完—
將專頁設定為「搶先看」/ "See first"，最新故仔馬上睇！
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #輪椅上的離婚案
Search